ILOILO CITY – Nakagwa na sa ospital si Pope Francis matapos ang tatlo ka gab-i bangud sa bronchitis.
Ang 86 anyos nga Santo Papa nga na-admit sa Gemelli hospital bangud nabudlayan nga magginhawa ang nag-joke pa sa crowd sang naggwa sa salakyan.
Sang ginpamangkot sang tawo kun kamusta ang iya nabatyagan, nagsabat ini nga buhi siya sa gihapon.
Kasunod sang paggwa sini sa ospital, magasugod na ini sa pagpanghanda para sa Semana Santa kag Easter, nga amo ang pinakaimportante nga semana sa Christian calendar.
Kung madumduman, sang Myerkules, naglain ang pamatyag ni Pope Francis sa atubang sang madamo nga tawo sa St Peter’s Square, apang nag-ayo man ang iya kondisyon sang nahatagan na sang antibiotics.
Sang Byernes, nagbisita pa ang Santo Papa sa children’s cancer ward sa ospital, nanghatag sang Easter eggs kag nagbunyag sang isa ka lapsag.
