ILOILO CITY – Kontrolado na sang Rapid Support Forces nga isa ka Sudanese paramilitary group ang Presidential Palace kadungan sang tension sa tunga sang grupo kag sang army nga nagresulta sa kinagamo.
May kinagamo nga gin-report sa palibot sang Presidential Palace kag Army Headquarters sa capital nga Khartoum.
Sa mga dalanon, may naka-deploy nga cannon kag armored vehicles kag may nabatian nga dalagko nga lupok malapit sa headquarters sang army kag sang Rapid Support Forces.
Sa ginpagwa nga statement sang Sudanese paramilitary group, nakontrol man sini ang mga airports sa Khartoum, Marwa kag al-Abiad nga nagresulta sa suspension sang flights pasulod kag pagwa sa airport sa Khartoum.
Pahayag dugang sang grupo nga nagbalos sila sa isa ka surprise attack sang army sa ila nila ka bases.
Suno naman sa Armed Forces Command sang Sudan, nagapadayon ang pagpakig-away batuk sa paramilitary group nga gin-akusaran nga nagapatigayon sang “traitorous plotting” batuk sa pungsod.
Ang United States ambassador to Sudan ang nagapanago sa subong bangud sang kinagamo sa capital.
Nahibaluan nga ang militar ang nagapamuno sa Sudan kasunod sang coup sang 2021 nga nagtapos sang power sharing arrangement nga ginporma kasunod sang pagsipa sa long-term former President nga si Omar al-Bashir.
Nagapadayon sa subong ang negosasyon sa tunga sang militar kag sang Rapid Support Forces sa katuyuan nga mabalik na ang civilian rule.
