ILOILO CITY- Sa ikaduha nga adlaw humalin kahapon, suspendido na naman subong nga adlaw ang klase sa syudad kag pila ka banwa sa probinsya sang Iloilo bangud sa mamunog nga ulan dala sang habagat.
Sa Iloilo City, gin-suspend ang klase sa Pre-school tubtob sa Senior High School.
Sa Iloilo Province, ang mga banwa nga automatic nga nag-suspend sang klase bangud sa Orange Warning Rainfall amo ang Pototan, Anilao, Janiuay, Mina, Maasin, Cabatuan, Zarraga, New Lucena, Sta. Barbara, Leganes, San Miguel, Pavia, Oton, Tigbauan, Alimodian, Leon, Tubungan, Guimbal, Igbaras, Miagao, San Joaquin, Igbaras, kag Ajuy.
Sa probinsya sang Guimaras, nagsuspend man sang face-to-face classes halin sa kindergarten pakadto sa Grade 12 sa private kag public schools epektibo alas-dose sa udto.
Samtang,ginbaha naman ang 29 ka mga barangays sa Iloilo City kun sa diin halos naglapaw sa hawak ang lebel sang tubig sa pila ka mga barangay gani napilitan ang mga pumuluyo nga mag-evacuate.
Sa Miagao, duha ka 10-wheeler wing vans ang naguot sa Oyungan River matapos nagtuyo nga magtabok apang na-trap matapos nagtaas ang tubig sa suba kag wala nasarangan ang mabaskog nga sulog sang tubig.
Nahibaluan nga indi gihapon maagyan sang mga truck nga masobra sa 10 gross tonnage ang detour route sa Oyungan River sa banwa sang Miag-ao.
Matandaan nga una na nga nag-usmod ang porsyon sang Oyungan Bridge sang naglaslas ang Bagyo Paeng sang Oktubre 2022.
