Gin-deklarar na sang Bureau of Fire Protection (BFP) nga “closed” kag “solved” na ang imbestigasyon kaangot sa pagkasunog sang maragtason nga Manila Central Post Office.
Sa report sang BFP, ginkumpirma nga “purely accidental in nature” ang natabo nga sunog.
Ginpahayag nga ang paglupok sang battery sang salakyan sa southern part sang basement ang rason sang pagsaka man sang init kag pressure nga nagresulta sa explosion.
Base sa report sang bureau sang nagligad nga Mayo 29, nahamtang ang car batteries sa basement kun sa diin yara man nabutang ang office supplies, thinners, kag mga pinta. Ini nga madali-masunog nga mga materyales ang nag-contribute sa madasig nga paglamon sang kalayo sa building.
Halos duha ka semana ang dalagan sang imbestigasyon sang BFP nga mas madasig sa ila inisyal nga estimate nga 45 ka adlaw.
Matandaan nga Domingo, Mayo 21 sang natabo ang sunog sa neoclassical building nga gintukod sang 1926. Martes naman ukon masobra pa 30 ka oras antes nadeklarar sang fire authorities ang “fire out”.
Yara sa P300 million ang una nga ginpahayag nga balor sang kahalitan dala sang sunog.
Matandaan nga nagtukod ang Senado sang special committee nga amo ang magalantaw kag magatutok sa rehabilitasyon sang Manila Central Post Office.
Ginduso man sa Kamara kag sa Senado ang imbestigasyon kaangot sa amo nga insidente. #
