Ginabaha sang pagdayaw ang isa ka 42-anyos nga iloy kag janitress sa Tuguegarao, Cagayan nga natalana nga mag-graduate sa kindergarten sa masunod nga bulan.
Ini amo si Remilyn Dimla nga naga-trabaho mismo sa Tuguegarao East Central School kun sa diin naka-enroll ang iya anak sa Grade 1.
Ginpahayag nga na-obserbahan sang school administrators nga nabudlayan si Dimla nga magsulat sang iya nga pangalan kun magkuha ini sang modules sang iya nga bata, gani gin-encourage nila ini nga mag-enroll sa kindergarten agud makahibalo ini nga magsulat kag magbasa.
Bangud willing man ini nga magtuon, nagsulod si Dimla sa klase kun sa diin ang iya mga classmates ang naga-edad sang 4-5 ka tuig.
Suno pa sa titser, malapit ang buot ni Dimla sa mga bata kag “Auntie” ang tawag sa iya sa classroom.
Ginpakigbahin man sini nga wala siya naka-eskwela bangud nadulaan ini sang gana matapos nga gin-una sang iya nanay ang pagpaeskwela sa iya nga stepsister.
Subong nga manugtapos na ini sa Kindergarten, plano sini nga padayunon pa ang iya nga edukasyon.
Natalana ang iya nga graduation ceremony sa Hulyo 14. #
