Nagduso si Senator Risa Hontiveros sang resolusyon agud hingyuon sa gobyerno sang Pilipinas nga ipasaka sa United Nations General Assembly (UNGA) ang isyu sa nagapadayon nga pagpang-harass sang China sa mga manugpangisda nga Pinoy sa West Philippine Sea.
Sa Senate Resolution No. 659, gintulod ni Hontiveros ang gobyerno partikular na ang Department of Foreign Affairs (DFA) nga mag-sponsor sang resolution sa UNGA agud manawagan sa China nga untaton ang harassment.
Tatlo ka mga insidente nga gin-mensyonar sang senadora sa iya nga resolution: una, ang pagtaya sang Chinese Coast Guard sang military-grade laser batok sa Philippine Coast Guard sang Pebrero; ikaduha, ang pag-harass sang Chinese forces sa Kalayaan Island Group sang Mayo nga ginkumpirma mismo sang Armed Forces of the Philippines; kag ikatatlo, ang paglunsar sang Livelihood Activities to Enhance Fisheries Yield and Economic Gains from the West Philippine Sea ukon Layag WPS project nga amo ang proyekto agud mabuligan ang fisherfolk nga ginpanghilabtan sang Chinese vessels subong nga Hunyo.
Ginpahayag pa ni Hontiveros nga apisar indi “legally binding” ang UNGA Resolution, may yara ini sang importante nga bug-at sa politikal nga aspeto.
“[…] A UN General Assembly Resolution, while not legally binding, carry significant political weight and serve as expressions of the will and consensus of the international community, with the potential to shape international norms, influence national policies, and provide guidance for the work of other UN organs, specialized agencies, and regional organizations,” kabahin sang statement sang senadora.
Paagi sa landmark nga Arbitral ruling sang 2016 suno sa natungdan, na-establisar nga wala sang legal nga basehan ang China nga angkunon ang historic rights sa resources nga iya sang Pilipinas.
Una na nga ginpahayag sang China nga wala sini ginakilala ang amo nga desisyon sang korte, kag padayon nga gin-claim nga ang parte sang exclusive economic zone (EEZ) sang Pilipinas ang kabahin gihapon sang teritoryo sang Beijing. #
