Apisar nabutang sa kontrobersiya ang anti-poverty czar nga si Larry Gadon bangud sa unanimous nga boto sang Korte Suprema agud i-disbar siya, wala ini nakapugong sa iya pagpabati-bati sa iya plano nga magpadalagan sa pagka-senador sa masunod nga eleksyon.
Sang ginpamangkot kun may plano ini nga elective position, gin-ako ni Gadon nga isa ini sa iya nga mga plano apang indi pa subong konkreto.
Sang ginpilit naman ang pagpamangkot kun gusto niya magpadalagan sa pagka-senador, sabat ni Gadon, naka-10 million votes man siya sang nagligad nga eleksyon bisan wala pa ang daku nga boto sang isa ka religious group nga kilala nga naga-practice sang bloc voting.
Nahibaluan nga nagpadalagan na sai Gadon sang 2016, 2019, kag 2022 senatorial elections apang wala gid nakalusot.
Lunes subong nga semana sang gin-anunsyo sang Malacañang nga gin-appoint siya ni President Ferdinand Marcos Jr. nga Presidential Adviser for Poverty Alleviation.
