ILOILO CITY – Nagpasalig si President Ferdinand “Bongbong” Marcos Jr. nga padayon nga nagatinguha ang iya administrasyon agud masiguro nga wala na sang may magutuman nga Filipino.
Ini ang ginpasalig ni Marcos kadungan sang iya pagtambong sang ika-56 nga founding anniversary sang Davao del Sur.
Sa iya nangin mensahe, ginpahayag sang presidente nga ang paghatag sang maayo nga serbisyo para sa mga Filipino ang naga-isahanon nga pamaagi agud nga mapasalamatan niya ang ginhatag nga pagsalig sa iya sang 2022 elections.
Dugang pa niya, lauman sang mga Filipino ang pag-uswag sang mga local nga negosyo, mas ginpa-ayo nga daily transactions, kag ang kabilugan nga maayo nga kalidad sang kabuhi.
Ang isa sa mga programa sang gobyerno agud nga masolbar ang problema sa kagutom kag kapigaduhon ilabi na sa mga pamilya nga may manubo nga kita amo ang “food stamp” program sang Department of Social Welfare and Development.
Sa labing una nga en banc meeting sang National Anti-Poverty Commission, nagmandu ang presidente sa mga government agencies nga ipatuman ang whole-of-government approach agud nga mabatuan ang madugay na nga problema sang kapigaduhon sa pungsod.
Liwat naman ini nga nagpanawagan sang pag-isa nga amo ang ginakabig niya nga pinakadako nga pagtilaw sa mga Filipinos.
