Nanindugan ang DDB Philippines, ang ahensiya nga ginkontrata para sa paglunsar sang bag-o nga tourism campaign sang pungsod nga “Love the Philippines”, nga indi kuwarta sang publiko ang gingamit agud nga mag-produce sang kontrobersyal nga audio-visual presentation.
Kadungan ini sang ila gin-release nga public apology bangud sa nabuyagyag nga paggamit sang stock footage para sa amo nga tourism video.
Paathag sang advertising agency, sila ang nag-produce sang amo nga presentation sa ila kaugalingon nga gasto bangud inisyatibo nila nga magbulig sa pag-pitch sang slogan kag agud nga ma-excite ang internal stakeholders sa amo nga kampanya.
Gin-athag sang ahensya nga wala sang na-release ukon i-release nga pondo ang Department of Tourism (DOT) para sa amo nga video.
Ginpaathag man sang DDB Philippines nga standard practice sa industriya ang paggamit sang stock footage sa mood videos, pero ila gin-ako nga may kakulangan man sila bangud kuntani, istrikto nga ginsunod ang screening kag approval process.
Nagpasalig man ang DDB nga magakooperar ini sa imbestigasyon nga himuon sang DOT. Nagpangabay man ini nga indi madula ang pagbaton kag pag-abi-abi sang mga tawo kag stakeholders para sa bag-o nga Love The Philippines campaign.
Ginpanindugan sang DDB nga isa ini ka isolated incident kag ila na na-delete ang video sa social media pages sang DOT.
Nahibaluan nga nangin kontrobersyal ang amo nga audio-visual presentation matapos nadiskubrehan nga lima ka scenes ang wala man gin-shoot sa Pilipinas kag ginkuha lamang online.
Sa ika-16 nga segundo sang campaign video, makita ang drone shot sang Tegallalang Rice Terraces, sa Ubud, Bali, Indonesia. Ini ang gin-contribute sang Filmovar sa website nga storyblocks.com.
Sa ika-19 nga segundo sang video, makita ang manugpangisda nga nagahaboy sang net. Base sa verification, ini ang kuha sa Thailand sang RedCupStudio.
Indi man original ang ika-21 nga segundo nga bahin sang promotional material. Ini ang slow motion landing sang passenger plane nga kuha sang Grey Coast Media sa Zurich, Switzerland.
Sa ika-25 nga segundo sang video, makita ang mga nagalumpat nga dolphins. Indi matumod kun sa diin ini nga lugar, apang una ini nga gin-upload sang contributor nga SceneLabPro sa website nga storyblocks.com.
Sa ika-36 nga segundo nga bahin sang promotional material, gingamit sang advertising agency ang video sang isa ka babayi nga naga-drive sang Sand Dune Buggy sa Dubai, United Arab Emirates.
