ILOILO CITY- Liwat nga nagpaandam ang otoridad batok sa modus operandi sang ginbansagan ‘Glue Lady’ nga nagapangbiktima sa syudad sang Iloilo.
Base sa record sang Iloilo City Police, gin-identify si Glue Lady bilang si Lunalyn De Pedro, 40, nga ang iya ulihi nga address amo ang Brgy. Gustilo, Lapaz, Iloilo City.
Sandig sa police records, si De Pedro ang may 13 na ka kaso nga ginalakipan sang Theft, Malicious Mischief, Swindling (Estafa) kag paglapas sa Access Device Regulation Act of 1998 ukon Credit Card Violation Act.
Nakomiter ini nga mga krimen sa syudad sang Iloilo, sa Sara, Iloilo, Bacolod City, kag sa Lipa City, Batangas.
Ang modus sini amo ang pagbutang sang glue agud magpilit ang keypad sa Automated Teller Machine partikular ang zero kag cancel button kag sa tion nga indi ini matum-ok sang kliyente nga nagagamit sang machine, palapitan niya ini agud magtanyag sang bulig tubtob nga pangayuon na sini ang Personal Identification Number ukon PIN sang iya mangin biktima.
Sunod, hambalon niya ang iya potensyal nga biktima nga ginlamon sang machine ang card kag balikan nalang sang tag- iya sa adlaw kon sa diin bukas ang mga bangko apang sa pagkamatuod, nakuha na niya ang card kag sa tion nga naglakat na ang iya biktima, didto na niya i-withdraw ang kwarta.
Sa masami, ginahimo niya ini kun Sabado bangud indi bukas ang mga bangko kag kalabanan nga target niya amo ang mga tigulang.
Sa interview sang Bombo Radyo kay PMaj Rolando Araño, spokesperson sang Iloilo Police Provincial Office, nagpangabay ini sa publiko nga mangin mahinalungon gid kag indi basta-basta magsalig sa mga tawo nga nagatanyag sang bulig.
Nagpangabay man ini sa pumuluyo nga i-report gilayon sa otoridad kun may impormasyon angot sa ginapanaguan ukon nahamtangan ni De Pedro.
