ILOILO CITY- Mas ginpahugot pa sang Iloilo Provincial Government ang border control sa mga kaiping nga probinsya nga may mga kaso naman sang African Swine Fever.
Sa interview sang Bombo Radyo kay Dr. Darel Tabuada, Iloilo Provincial Veterinarian, iya ginpahayag nga may yara sang dugang nga mga personnel nga ginpangbutang sa mga ports kag seaports ilabi na sa Dumangas Port kag Bay-ang Port sa banwa sang Ajuy.
Suno kay Tabuada, mas barato ang presyohanay sang buhi nga baboy sa iban nga probinsya kaangay sang Negros Occidental kag Antique kun ipaanggid sa Iloilo.
Apang ginpahayag ni Tabuada nga kinahanglan nga mabantayan sang insakto kag ma-monitor sang maayo ang puerto bangud posible nga malusotan sang baboy nga infected sang nasambit nga balatian.
Sa subong, ang ginahimo sang mga personnel sang Provincial Veterinary Office agud nga masiguro nga hilway sa African Swine Fever ang baboy nga halin sa Negros Occidental amo ang pag-check sang dokumento kaangay sang Certificate of Free Status bangud ini ang nagapamatuod nga indi infected sang balatian ang baboy halin sa iban nga probinsya.
Dugang sang natungdan, kadam-an sa mga nagabakal sang baboy halin sa iban nga probinsya amo ang mga traders.
Gin-athag ni Tabuada nga mahimo makasulod sa probinsya sang Iloilo ang baboy halin sa iban nga probinsya bangud pareho man lang nga may narekord nga kaso sang African Swine Fever .
Kun basehan naman ang swine inventory, may yara na lang sang 90,543 hog heads ang probinsya sang Iloilo apang bastante pa ini para sa consumption sang mga pumuluyo sa probinsya.
