Natalana nga pirmahan ni President Ferdinand Marcos, Jr. subong nga adlaw ang New Agrarian Emancipation Act, ang hagna nga amo ang magabuhin sa binilyon ka pesos nga palas-anon sang mga benepisyaryo sang Agrarian Reform.
Kaangot ini sa ila wala nabayaran nga mga obligasyon sa gobyerno sa duta nga ila nga nabaton halin sa Comprehensive Agrarian Reform Law.
Sa idalom sang sini nga layi, opisyal nga i-condone ang P57-billion nga balor sang utang sang masobra 600,000 ka agrarian reform beneficiaries.
Samtang ginapirmahan ni Marcos ang hagna agud mangin layi subong nga aga, magapanguna naman si Agrarian Reform Secretary Conrado Estrella III sa pagpanagtag sang 32,441 ka titulo sang duta sa 27,132 ka mga benepisyaryo sa bilog nga pungsod. Sakop sini ang masobra 46,000 ka ektarya sang duta suno sa ahensya. Suno pa sa ahensya, ang layi ang maga-condone sang tanan nga utang sang agrarian reform beneficiaries lakip na ang wala nabayaran nga amortisasyon, interes, kag surcharge.
Matandaan nga sa iya una nga State of the Nation Address (SONA), nagmandu si Marcos sa Kongreso nga magpasar sang layi agud nga mapanas ang utang sang mga mangunguma halin sa duta nga ila nabaton sa idalom sang Comprehensive Agrarian Reform Program (CARP).
Ginsiling naman sang DAR nga ini ang pinaka-importante nga legislation nga napasar sa pungsod halin sang na-deklarar ang pungsod nga agrarian reform area sang tion ni the late President Ferdinand Marcos Sr. sang Oktubre 1972. #
