ILOILO CITY- Ginpa-Bombo sang mga truck drivers ang sitwasyon sa Oyungan bridge sa Miagao, Iloilo matapos nga na-stranded ang mga ini bangud sa nagguot nga duha ka salakyan sa alternative route sa suba rason nga indi man makaagi ang iban nga salakyan.
Sa interview sang Bombo Rady kay Rex Fernandez, isa ka byahedor, iya ginpahayag nga halin pa sang aga sila nagahulat nga mapangitaan paagi agud makahulag ang trapiko sa area apang nahapunan lang kag wala gid nasolusyunan ang problema.
Suno kay Fernandez nga naga-drive sang wing van, apektado ang ila palangabuhian bangud sa insidente.
Ginbasol man sini ang Local Government Unit sang Miagao kag ang Department of Public Works and Highways nga kaangay nga wala ginsapak ang ila panawagan.
Matandaan nga naguba ang taytay sang paglaslas sang Bagyo Paeng kag ginhimuan sang Bailey bridge apang limitado lang sa mamag-an nga mga salakyan ang mahimo nga makalabay.
