ILOILO CITY – Natalana nga i-lunsyar sang Department of Education ang revised curriculum para sa Kinder tubtob Grade 10 ukon (K to 10) sa masunod nga mga semana.
Department of Education
Suno kay Education spokesperson Undersecretary Michael Poa, ang “decongested” K to 10 curriculum ang ipatuman sa School Year 2024-2025.
Agud nga ma-improve ang kalidad sang basic education sa pungsod, ginpahayag ni Poa nga ang bag-o nga curriculum ang magatutok sa mga subjects nga math, science, english, reading, kag values formation.
Ginbuksan sang ahensya ang draft sang K to 10 curriculum para sa public review sang Abril kun sa diin, ang mga experts, members sang academe, kag iban pa nga education stakeholders ang ginpangabay nga maghatag sang feedback agud nga madihon ang mga papeles kag ang pagsulundan sa revised curriculum.
Para naman sa K to 12 curriculum, ginpahayag sang natungdan nga nagapadayon pa ang review.
Sang Mayo, gin-organize sang ahensya ang national task force nga maga-review sang pagpatuman sang senior high school program.
Una na nga ginpahayag ni Vice President kag Education Secretary Sara Duterte nga ang K to 12 curriculum ang bag-uhon sa katuyuan nga maka-produce sang “competent, job-ready, active, and responsible” graduates.
