Pag-relieve sa hepe sang AJUY PNP, wala sang kaangtanan sa kontrobersyal nga pagserbe sang search warrant sa isa ka pamilya nga nag-alegar planted sang pulis ang narekober nga mga armas–IPPO Director Palomo

ILOILO CITY- Gin-athag ni PCol Ronaldo Palomo, direktor sang Iloilo Police Provincial Office, nga wala sang kamatuoran ang alegasyon nga gin-relieve niya si PLt. General Enrique Robles sang Ajuy Municipal Police Station.

Ini may kaangtanan sa ginapahayag reklamo sa pagserbe sang search warrant sang police station sang tinalikdan nga Hulyo 8 sa Brgy. Luca, Ajuy kun sa diin gin-alegar sang pamilya Animas nga planted sang mga pulis ang mga armas nga nakuha sa sulod sang ila puluy-an.

Sa interview sang Bombo Radyo kay PCol Palomo, iya ginpahayag nga dungan niya nga gin-relieve si PLt. Robles kag si PLt. Randy Lambungan sang 2nd Iloilo Provincial Mobile Force Company kag ginbaylo ang ila nga mga assignments.

Suno kay Palomo, katuyuan niya nga hatagan man sang oportunidad ang mga pulis nga magserbisyo sa lain nga unit.

Si PLt. Robles subong ang yara sa 2nd Iloilo Provincial Mobile Force Company kag si PLt. Lambungan naman ang Officer In Charge Chief sang Ajuy Municipal Police Station.