Ipaguwa na sang appeals chamber sang International Criminal Court (ICC) sa masunod nga semana ang desisyon sini kasunod sang hingyo sang Pilipinas batok sa pagpadayon sang imbestigasyon sang korte sa sa mga kamatayon sa pungsod nga gina-angot sa war on drugs.
Sa tatlo ka pahina nga scheduling order nga pirmado ni Presiding Judge Marc Perrin de Brichambaut, ginpahayag sang appeals chamber nga i-deliver ang desisyon sa open court sa Hulyo 18.
Sang Enero, ginhatagan otoridad sang International Criminal Court ang pagbukas liwat sang imbestigasyon sa anti-drugs campaign sa pungsod kun sa diin linibo ang napatay.
Madumduman nga sang tion ni former President Rodrigo Duterte sang 2019, nag-withdraw ang Pilipinas sa amo nga korte sa The Hague matapos nga nag-umpisa ini sang preliminary probe sa amo nga kontrobersyal nga kampanya kontra sa iligal nga droga.
Gin-untat ang imbestigasyon sang Nobyembre 2019 bangud nag-insister ang Pilipinas nga ginatun-an man sini liwat ang mga kaso; apang naghingyo si Prosecutor Karim Khan nga buksan liwat ang inquiry bangud indi bastante ang pamatuod sang Philippine government nga nagapatigayon matuod ini sang bastante nga imbestigasyon.
Marso sang nag-file sang appeal ang Pilipinas agud baliskaron sang korte ang desisyon sini nga buksan liwat ang amo nga imbestigasyon.
Ginapanindugan sang Office of the Solicitor General nga wala sang hurisdiksyon ang ICC sa Pilipinas bangud naghalin na ang pungsod sa amo nga tribunal sang 2019. #
