ILOILO CITY- Nanindugan ang live-in partner sang ginatudlo nga gunman sa pagpatay sa waiter sang MO2 bar nga wala gid sang kahilabtanan sa krimen ang mga ini.
Ang biktima sa amo nga pagpangluthang nga natabo sa Brgy. North Fundidor, Molo,Iloilo City amo si Alejandro Panes Jr.
Sa interview sang Bombo Radyo kay Maila Inesoria, live-in partner ni Rex Amoroso sa sulod na sang pito ka tuig, iya ginpahayag nga apisar may mga daan na nga kaso ang ginatudlo gunman sa krimen, sigurado siya nga inosente ini sa pagpatay kay Panes.
Gintuad ni Inesoria nga pila ka beses na gid man nga napreso si Amoroso bangud sa kaso nga carnapping kag involvement sa illegal drugs.
Ginpanginwala naman sini nga siya ang nagpapalagyo kay Amoroso sang nagpadulong ang otoridad sa Brgy. Zamora-Melliza, Dela Rama Street, Iloilo City Proper agud arestuhon ini.
Si Maila ang isa sa mga ginpreso sang otoridad kaupod sa iban nga mga suspek.
Antes ang pagpanginwala ni Inesoria, una na nga nag-ako ang isa pa sa mga arestado nga suspek nga si Rene John Inesoria nga hinablos man niya nga siya ang driver sang motorsiklo nga ginsakyan ni Rex Amoroso sang ginpatay sini ang biktima.
Gintuad man ni Rene John nga isa ka certain Rene Boy nga detained sa New Bilibid Prison ang nagsugo sa pagpapatay kay Panes.
Apang sang ulihi, ginbawi man ni Rene John ang iya pahayag.
