ILOILO CITY- Wage recovery lang kag indi wage increase ang ginapangayo sang alyansa sang mga mamumugon sa Western Visayas nga P100 nga adjustment sa sweldo kada adlaw.
Sa interview sang Bombo Radyo kay Mr. Elmer Forro, Secretary General sang BAYAN-Panay, iya ginpahayag nga apisar may ginpatuman nga wage increase nga P450 minimum daily, wala man ini mabatyagan sang mga mamumugon.
Suno kay Forro, sa pagkamatuod, napierde pa ang kada mamumugon sang P87 pesos kada adlaw bangud indi mabawi sang amo nga wage increase ang dako nga dugang sa presyo sang mga balaklon.
Ginkalipay naman ni Forro nga may positibo nga resulta ang ila ginaduso nga wage recovery kasunod sang ila petisyon sa Regional Tripartite Wages and Productivity Board.
Suno sa natungdan, gintalana na sa Hulyo 20 ang pagsinapol agud istoryahan ang ginahingyo nga dugang sa sweldokag patigayunon naman ini sa National Economic and Development Authority.
Wala naman nagapati si Forro nga negatibo ang epekto sa mga employer sang pagpataas sang sweldo bangud sa pagkamatuod, makapapagsik pa ini sang ekonomiya.
