Atensyon sa mga nagapatukar dira sang music nga abi nila sila lang ang tawo sa barangay!
Sa Barcelona sa Espanya, isa ka lalaki ang nagapangatubang sang sentensya nga isa ka tuig sa presuhan bangud sa pagpatukar sang wala-untat kag tuman ka tunog nga electrical music sa sulod na sang lima ka tuig nga halos ikabungol sang iya nga mga kasilingan.
Nag-umpisa ang reklamo sang 2012 kun sa diin sulit-sulit nga nagahingyo ang iya nga mga tupad balay nga hinayon lang kuntani ang volume apang wala namati ang amo nga tawo. Sang 2015, nag-file na gid sang reklamo ang tatlo ka kasilingan bangud indi na gid sila makaagwanta.
Ginpahayag nga wala ginsapak sang akusado ang mga reklamo sang mga kasilingan kag pati ang pagsaway sang pulis.
Ginpahayag nga nagadangat sa 57 decibels ang sound measurement sang music kun adlaw kag yara naman sa 56 decibels kun gab-i nga tuman ka layo sa 35 decibels nga amo lang ang ginatugutan sang layi.
Suno sa mga kasilingan, pati tul-an nila daw ma-vibrate bangud wala sang untat nga ‘boom boom’!
Isa man ka tigulang ang nagsaad nga naglala ang iya nga insomnia kag kinahanglan pa ang sedative-hypnotic treatment. Naglala man ang Alzheimer’s disease sang isa ka kasilingan bangud sa anxiety.
Sang sini lang, nagdesisyon ang korte kag ginpapanaogan sang sentensya ang amo nga electronic music fan.
Mapreso ini sa isa ka tuig kag tatlo ka bulan. Mabayad man ini sang $20,000 ukon P1.08 million nga kumpensasyon kag $2,417 ukon masobra P131,000 nga multa. Banned man ini nga mag-practice sang anuman nga propesyon nga kaangot sa electronic music. #
