Posible nga matapos na ang pag-alburuto sang Bulkan Mayon sa masunod nga sinemana base sa forecast sang Philippine Institute of Volcanology and Seismology (Phivolcs).
Ang Mayon nga amo ang pinaka-aktibo nga bulkan sa Pilipinas ang ginpaidalom sa Alert Level 2 sang Hunyo 5 kag ginpasaka sa Alert Level 3 matapos ang tatlo ka adlaw. Amo sa gihapon ang alert level status tubtub subong.
Suno kay Phivolcs resident volcanologist Paul Alanis, base sa computations sang ahensya, yara sa 16 million cubic meters sang volcanic materials ang ginapaguwa. Kun ipaanggid ini sa kaangay nga paglupok sang 2009 nga naglab-ot sa 20 million cubic meters sang volcanic materials, malapit na lang suno sa natungdan kag maga-untat na ang eruption.
Matandaan nga yara sa 40,000 ang ginpangbakwit sang naglupok ang Mayon sang 2009.
Ginpahayag man sang Phivolcs nga may nagakatabo subong sa Mayon nga “effusive eruption” kun sa diin naga-sige-sige sa pagguwa ang lava sa baba sang bulkan.
Yara sa masobra 20,000 ka mga residente ang nabakwit halin sa six-kilometer permanent danger zone sang bulkan umpisa sang nag-alburuto ang Bulkan Mayon. #
