ILOILO CITY- Nagpanugyan ang bag-o nga direktor sang Department of Agriculture Region 6 sa mga mangunguma nga mangita sang alternatibo nga pananom subong nga El Niño phenomenon.
Sa interview sang Bombo Radyo kay Director Dennis Arpia, iya ginpahayag nga madamo sang pananom nga makabato sa mainit nga panahon kaangay sang mga utan nga makahatag sa mga mangunguma sang alternative source nga temporaryo nga makuhaan nila sang income.
Suno kay Arpia, nakahibalo naman humalin pa sadto anay ang mga mangunguma ilabi na sa mga rain-fed areas nga indi magtanom subong bangud sa dry spell.
Mas maayo pahayag sang natungdan kun may yara sang shallow tube wells ang mga mangunguma agud nga makabulig pasangkad sang ila nga productivity bangud sa limitado nga supply sang tubig sa tion sanv dry season.
Kun wala sang available nga tubig pahayag sang director, indi na magtanom sang humay.
Nagpasalig si Director Arpia nga may mga proactive measures na ang Department of Agriculture agud nga mabuligan ang mga mangunguma sa pag-shift sa alternative crops, paghatag sang techniques may kaangtanan sa water management kag pag-supply sa agricultural facilities kag equipment.
Nahibaluan nga natalana nga mag-release si Presidente Ferdinand Marcos Jr. sang El Niño Mitigation Plan nga ipakigbahin sa publiko agud nga ma hagan-hagan ang epekto sang nasambit nga weather phenomenon.
