ILOILO CITY- Gin-ako sang chairman sang Infrastructure Committee sang Regional Development Council nga mangin mabudlay ang sitwasyon kun indi pa matandog ang Ungka Flyover bangud sa pending nga kaso sang Department of Public Works and Highways sa Ombudsman.
Ini nahanungod sa kaso nga ginpasaka ni Iloilo City Councilor Plaridel Nava sa Office of the Ombudsman batok sa mga opisyal sang Department of Public Works and Highways kag mangin sa International Builders Corporation.
Sa interview sang Bombo Radyo kay Iloilo City Mayor Jerry Treñas, iya ginpahayag nga ang kaso nga ginapangatubang sang ahensya ang mahimo nga magdugay sang pila ka tuig.
Suno sa alkalde, daw nagagwa nga wala na sang iban nga pwede mahimo kun indi ang maghulat nalang asta matapos ang kaso.
Ginpaathag ni Treñas nga katungdanan sang Department of Public Works and Highways nga pangitaan sang solusyon ang problema sa depektibo nga Ungka Flyover samtang wala pa natumod kun sin-o gid man ang may salabton sa amo nga kapalpakan.
Dugang pa sang natungdan, nagpangita na ini sang paagi agud nga siya na mismo ang makasugilanon kay Secretary Manuel Bonoan sang Department of Public Works and Highways.
Nahibaluan nga nagpahayag ang Department of Public Works and Highways Region 6 nga hulaton nalang nila ang desisyon sang Central Office may kaangtanan sa masunod nga mga tikang nga ila himuon angot sa Ungka Flyover matapos nga ginpasa na man ang mga rekomendasyon para sa rehabilitasyon sang palpak nga proyekto.
