ILOILO CITY- Ginakabig ni Iloilo City Councilor Plaridel Nava nga isa ka positibo nga development ang amat-amat nga pagbayad sang mga Board of Directors sang ila loan sa Iloilo City Government Employees Multi- Purpose Cooperative.
Sa interview sang Bombo Radyo kay Councilor Nava, iya ginpahayag nga mas maayo pa gid kuntani nga mabayaran tanan ukon maimpas gilayon sang mga Board of Directors ang ila utang.
Apang suno kay Nava, apisar maka-fully pay, kinahanglan sa gihapon nga mag-resign ang nasambit nga mga opisyal sang kooperatiba bangud nadula na ang trust and confidence sang mga myembro sa ila.
Gina-engganyo man sini ang mga myembro nga mag-file sang administrative oomplaint batok sa mga Board of Directors kag ipaagi kay Mayor Jerry Treñas agud mahatagan sang nagakaigo nga tikang sang alkalde.
Gindugang man ni Nava nga mahimo man magpasaka sang kaso nga syndicated estafa ang mga myembro apang nagakinahanglan ini sang mas madamo nga ebidensya kag mas madugay ang ini nga proseso.
