ILOILO CITY- Nagdepensa ang Local Government Unit sang Tigbauan, Iloilo kasunod sang nabaton sini nga mga reklamo kag pagpakamalaot gikan sa publiko bangud sa sitwasyon sang gina-construct nga dalan nga nagaresulta sa malala nga pag-igod sang trapiko partikular sa Parara Sur.
Sa interview sang Bombo Radyo kay Tigbauan Mayor Virgilio Nene Teruel, iya ginpahayag nga ang nasambit nga widening and concreting project ang iya sang national government paagi sa Department of Public Works and Highways- Iloilo 1st District Engineering Office kag may budget nga kapin sa P84 million kag ang kontraktor amo ang Asia Structural Developer Corporation.
Suno pa kay Teruel, bangud nga national government project ini, ang responsable gid kuntani sa pagdumala sang trapiko amo ang Department of Public Works and Highways ukon ang kontraktor.
Apang, bangud nga yara sa ila jurisdiction ang proyekto, ginpahayag sang alkalde nga indi man nila mabatas nga pabay-an ang sitwasyon.
Suno pa sa opisyal, sa pagkamatuod, nagdeploy ang Local Government Unit sang mga traffic enforcers, amo man ang mga tanod sa mga barangay nga apektado man kaangay sang Parara Norte kag Buyuan, kag nagabulig man ang Tigbauan Municipal Police Station.
Nagpangabay naman ini sa mga motorista nga kun mahimo likawan ang mag-counterflow agud indi maglala ang sitwasyon sang trapiko ilabi pa nga maulanon ang tiempo nga nagapa-delay pag gid sang construction works.
Sa interview naman sang Bombo Radyo kay Tigbauan Municipal Engineer Carlos Locsin, iya ginpahayag nga ang mayor man nga nangin kabangdanan sang problema sa trapiko amo nga wala sang diversion road nga mahimo kuntani malabayan sang mga salakyan.
Suno sa iya, masako gid man sa trapiko ang amo ang dalan bangud diri nagalabay ang tanan nga motorista nga nagapadulong sa Guimbal, Miagao, San Joaquin kag Antique.
