ILOILO CITY- Wala sang pasin-uhon ang Iloilo City Police Office kun ang kampanya batok sa illegal drugs ang istoryahan.
Ini kasunod man sang pagkaaresto sa duha ka mga punong barangay sa Iloilo Province sa ginpatigayon nga buybust operation.
Una nga nadakpan sang Hunyo si Punong Barangay Elvie Paez sang Barangay Lip-ac, San Enrique, Iloilo matapos nabaklan sang ginapatihan shabu.
Sunod naman nga nadakpan sa buy bust operation si Punong Barangay Bernard Galache sang Barangay Inagdangan Centro, Zarraga, Iloilo.
Sa interview sang Bombo Radyo kay PCol Joeresty Coronica, director sang Iloilo City Police Office, iya ginpahayag nga bisan opisyal sang barangay basta may ebidensya kag kumpirmado nga naga-engage sang iligal nga buluhaton, ila ini i-operate kag arestuhon.
Nanindugan naman si Coronica nga wala sang drug protector nga personnel sang Iloilo City Police Office kag 100% ang ila katampad sa kampanya batok sa illegal drugs.
Gindugang naman sang director nga padayon ang ila koordinasyon sa iban nga ahensya sang gobyerno kaangay sang Philippine Coast Guard agud mabantayan kag mapunggan ang paglusot sang mga kontrabando sa mga pwerto sa syudad.
