ILOILO CITY- Ginkakas sa ila trabaho ang duha ka mga jobhires sang Iloilo City Urban Poor Affairs Office bangud sa alegasyon nga ilegal nga pagbaligya sang duta sang relocation sites sang siyudad sa San Isidro kag Sambag sa Jaro.
Sa interview sang Bombo Radyo kay Mr. Roy Firmeza, department head sang nasambit nga talatapan, iya ginpahayag nga kilala niya mismo ang duha ka mga jobhires nga ginpahalin ni Mayor Jerry Treñas.
Suno kay Firmeza, wala nag-agi sa iya talatapan ang reklamo kag posible nga nagreklamo diretso sa opisina sang alkalde kag gilayon nga gin-aktuhan.
Pahayag ni Firmeza,sa iya pagtan-aw, nagakaigo nga hatagan kuntani sang due process ang mga empleyado nga ginpahalin ni Mayor Treñas bangud base sa record, maayo man ang performance sang ginpahalin nga mga jobhires.
Dugang pa sang natungdan, makapila na man nga kahigayunan nga naagyan niya ang pareho nga isyu kag wala niya ini gin-atrasan gani handa man siya nga atubangon ini subong.
