ILOILO CITY- Ginakalipay ni Iloilo Governor Arthur Defensor Jr. ang pagka-determinado kag pagka-agresibo sang Department of the Interior and Local Government nga matinluan ang hanay sang Philippine National Police batuk sa iligal nga droga.
Matandaan nga nagpanawagan si Interior Secretary Benjamin Abalos Jr. sa mga high-ranking Philippine National Police officials nga magpasa sang courtesy resignation kasunod sang internal cleansing efforts sang ahensya bangud sa ginaalegar kaangtanan sa illegal drug trade.
Ang tanan nga mga police officials nga nagpasa sang resignation ang ginpadala kay President Marcos kun sa diin ginbaton sang presidente ang resignation sang 18 ka mga high ranking police officials.
Apang wala ginkumpirma ni Sec. Abalos kun bala ang 18 ka mga police generals kag colonels ang kumpirmado nga naangot sa iligal nga droga.
Sa interview sang Bombo Radyo kay Gov. Defensor, iya ginpahayag nga sang mga nakaligad nga bulan, nakaistoryahanay sila ni Sec. Abalos kag gin-acknowledge ang mga pangpanghangkat agud nga matinloan ang hanay sang kapulisan.
Apang bangud sa pagpanikasog suno sa gobernador, makabig ini subong nga achievement para kay President Ferdinand “BongBong” Marcos, Jr. kag sa Department of the Interior and Local Government.
Nahibaluan nga sa probinsya sang Iloilo, gin-alegar sang High Value Target Individual nga naaresto sa ginpatigayun nga drug buy-bust operation nga si Robert Kristian Dacara nga may personnel sa Pototan Municipal Police Station nga nagabaton sang P5000 nga payola halin sa iya.
