ILOILO CITY- Ginapanan-aw nga magalawig pa sang tubtob tatlo ka adlaw ang pag-antos sang mga pumuluyo mataas nga tubig-baha sa Balabago, Jaro, Iloilo City.
Sa interview sang Bombo Radyo kay Zaida Dalipe, iya ginpahayag nga base sa ila eskperyensiya, madugay magtahaw ang tubig-baha sa ila lugar.
Nagpangabay naman ini sa mga nagalabay nga salakyan nga magpasunaid kag hinayon lang ang pagpadalagan agud indi man magbalod-balod kag magsulod ang tubig-baha sa ila balay nga ara gid sa kilid sang karsada.
Samtang, ginabasol naman sang mga residente sa Camalig, Jaro ang gagmay nga mga tamburong nga ginbutang sang isa ka gina-construct nga subdivision sa lugar.
Sa interview sang Bombo Radyo kay Ligaya Francisco, iya ginpahayag nga indi masarangan sang tamborong ang bulyada sang tubig.
