ILOILO CITY- Nakapanagtag na ang Department of Social Welfare and Development sang 3243 family foodpacks para sa mga lugar sa rehiyon nga apektado sang Bagyo Egay kag habagat nga nagresulta sa mabaskog nga ulan, baha kag landslides.
Sa interview sang Bombo Radyo kay Atty. Carmelo Nochete, regional director sang Department of Social Welfare and Development Region 6, iya ginpahayag nga magluwas sa family food packs, may yara man sang hygiene kits kag sleeping kits.
Suno kay Nochete, sa latest data sang iya opisina, yara sa 24,153 ka mga pamilya ang apektado kag pinakadamo diri ang sa Negros Occidental kag ginasundan sang Antique kag Aklan.
Pahayag niya, sa subong, nagahulat lang sila sang dugang nga request halin sa mga local government units agud magpadala sang dugang nga kinahanglanon sang mga pumuluyo.
