ILOILO CITY- Ginalantaw sang pamunuan sang Iloilo City Police Office nga pamatuod sang pagbalik sang salig sang mga pumuluyo sa amo nga opisina ang nabaton nga pagkilala bilang Outstanding City Police Office (Unit Awardee) in the Field of Police Community Relations.
Mismo ang Police Regional Office 6 ang nagkilala sa amo nga unit kun sa diin mismo si Director PCol Joeresty Coronica ang nagbaton sang Plaque of Recognition sa seremonya sa Camp Martin Teofilo Delgado kadungan sang 28th Police Community Relations Month Culminating Ceremony.
Sa interview sang Bombo Radyo kay PCol Coronica, iya ginpahayag nga dako ang iya pagpasalamat sa ginapakita nga suporta kag paagsalig sang publiko sa serbisyo nga may katampad kag sinseridad sang kapulisan.
Suno kay Coronica, dako man ang bulig sang Iloilo City Government sa pagpanguna ni mayor Jerry Treñas nga naghatag sang logisitical support sa Iloilo City Police Office.
