ILOILO CITY- Nagapati si Senator Imee Marcos nga dapat hibaluon anay ang ugat sang problema sa Ungka Flyover bag-o maggasto sang dugang nga milyones para sa rehabilitasyon sini.
Sa interview sang Bombo Radyo kay Senator Marcos, iya ginpahayag nga indi lang ini nahanungod sa pagpangita sang budget kundi pati man ang pagsabat sa mga akusasyon angot sa palpak nga flyover.
Suno sa senadora, dapat man nga mangin accountable ang Department of Public Works and Highways sa mga natabo nga depekto sa proyekto.
Gindugang naman sang senadora nga samtang wala pa ang deliberasyon para sa dugang nga budget sa Ungka flyover, mas maayo nga subong pa lang mangita na kun diin magahalin ang P250 million nga kwarta nga paggagamiton para sa rehabilitasyon.
Samtang, gintuad naman ni Senadora Marcos nga nagakinahanglan sang dugang nga P8.48 billion ang ginapatindog nga Jalaur River Multi-Purpose Project.
Suno kay Marcos, para ini sa himuon nga upland canal kag para sa completion.
Nahibaluan nga yara na sa kapin 80% nga nahuman ang proyekto nga gina-target nga maka-operate sa 2024 ukon sa 2025.
