ILOILO CITY- Ginahatagan prayoridad sang pamunuan sang Iloilo City Police Office ang mental health sang mga kapulisan.
Sa interview sang Bombo Radyo kay PCol Joeresty Coronica,direktor sang Iloilo City Police Office, iya ginpahayag nga tuman ka stressful ang trabaho sang mga kapulisan ilabi na ang mga myembro sang mga anti-illegal drugs operatives bangud exposed ang mga ini sa nagkalain-lain nga mga emosyon sa tion sang operasyon.
Suno kay Coronica, magluwas sa pressure sa trabaho, may pressure man halin sa ila pamilya ang mga pulis.
Pahayag ni Coronica, kun indi madumala ini nga stress kag pressure, mahimo ini magresulta sa depression nga magaapekto sa performance sang isa ka police officer.
Dugang sang direktor, ini ang rason kun ngaa nagpatigayon sila sang stress management seminar agud nga mahatagan sang mas masangkad nga ihibalo ang kapulisan tuhoy sa kun paano atubangon ang mga pagpanghangkat sa ila trabaho kag mahibaluan kun ano nga mga aktibidad ang makabulig agud maproteksyonan ang ila mental health condition.
