ILOILO CITY- Gindayaw ni Board Member June Mondejar ang liderato ni PCol Ronaldo Palomo bilang direktor sang Iloilo Police Provincial Office may kaangtanan sa kampanya kontra sa iligal nga druga.
Sa interview sang Bombo Radyo kay Board Member Mondejar, Chairman sang Committee on Public Order and Security sa Sangguniang Panlalawigan, iya ginpahayag nga sunod-sunod ang madinalag-on nga mga anti-illegal drug operations sang Iloilo Police Provincial Office.
Suno kay Mondejar, nagapakita ini nga sinsero si Palomo kag ang iya mga tinawo nga papason ang tanan nga mga involved sa illegal nga druga.
Pamatuod diri amo ang pagkaaresto sa mga barangay officials nga ginalakipan sang mga punong barangay kag barangay kagawad sa separado nga mga buy bust operations.
Kaangot sini, nag-sponsor si Mondejar sang resolution nga naga-commend kanday PCol Ronaldo Palomo, Major Harold Rendora kag myembro sang Provincial Drug Enforcement Unit para sa madinalag-on nga buy bust operations.
