Wala pa sang plano ang gobyerno nga magpadala sang dugang nga mga barko sa Ayungin Shoal apisar sang panibag-o nga pagpang-harass nga ginhimo sang China.
Suno kay Armed Forces of the Philippines (AFP) Chief of Staff Romeo Brawner Jr., wala sang bastante nga barko ang pungsod.
“Well, right now we don’t have any plans of adding more ships that we’re going to moor at the Ayungin Shoal. Not a good plan because definitely we will need all of our ships to be able to sail our seas and we don’t have enough ships,” suno kay Brawner.
Matandaan nga sang weekend, naggamit ang Chinese Coast Guard sang water cannons agud bombahan sang tubig ang sakayan sang Pilipinas sang padulong kuntani sa resupply mission sa tropa sang militar nga yara sa BRP Sierra Madre.
Ang BRP Sierra Madre isa ka World War II-era ship nga grounded sa Ayungin Shoal halin sang 1999 agud mag-serbe nga military outpost sang Pilipinas sa West Philippine Sea.
Ginaduso naman sang duha ka mga senador nga ipaakayo ang amo nga barko agud mapabakod pa kag mapakita ang sovereign rights sang Pilipinas sa amo nga teritoryo.
Suno kay Senate President Juan Miguel Zubiri, kun makaayo ang BRP Sierra Madre, mahimo pa ini makatabog sang mga bully halin sa North, kag mahimo man makabulig sa marines pananglitan may mag-abot nga kalamidad.
Suno naman kay Senator Risa Hontiveros, suportahan niya ang inisyatibo pananglitan mag-request ang Philippine Navy kag ang AFP nga kaayuhon ang commissioned vessel.
Una na nga ginpahayag sang Chinese Foreign Ministry nga ila ang Ayungin Shoal nga ila ginatawag nga Ren’ai Jiao. Gina-insister sang China nga ila ang amo nga teritoryo apisar nahamtang ini 194 kilometers halin sa Palawan nga sulod sa exclusive economic zone sang Pilipinas. #
