Nag-file sang separado nga mga resolution sanday Senador Risa Hontiveros kag Senador Aquilino ‘Koko’ Pimentel III agud magpanawagan sang imbestigasyon sa Senado kaangot sa 17-anyos nga solterito nga natiruhan-patay sang mga pulis sa isa ka operasyon sa Navotas City.
Napatay ang biktima nga si Jemboy Baltazar sang Agusto 2 bangud nasal-an ini sang mga pulis nga isa ka suspek sa murder.
Sa Senate Resolution No. 742, ginduso ni Hontiveros ang inquiry in aid of legislation nga magatutok sa paggamit sang pulis sang sobra-sobra kag makamamatay nga pwersa.
Ginduso man sini sa Ombudsman kag sa Department of Justice (DOJ) nga mag-imbestigar sa hepe sang Navotas police nga si Police Colonel Allan Umipig bangud sa gindudahan nga pagtabon-tabon pa kuntani sini sa mga pulis nga involved sa operasyon.
Gin-relieve na sa pwesto si Umipig kag nagapangatubang na sang kaso-administratibo apang indi pa ini bastante suno sa senadora bangud wala pa sang nahatag nga hustisya.
Sa pihak nga bahin, sa Senate Resolution No. 736, nagpahayag naman si Senador Pimentel nga kinahanglan ang legislative inquiry bangud kun indi ini ma-imbestigaran, daw kaangay lang nga ginatugutan ang pagpang-abuso sang mga pulis. Isa man ini ka selective justice suno sa senador nga nagapabor sa mga pulis kag pagtulok lamang samtang nga nagakatiphag na ang salig sang mga tawo sa police force.
Ang involved nga mga pulis ang napaidalom na sa inquest proceedings sa kaso nga reckless imprudence resulting in homicide. Wala sila nagtambong sa preliminary investigation sa kaso sang nagligad nga Martes apang nagpadala lang sang ila nga mga legal representative. #
