Nagwangal ang kampo ni Negros Oriental Rep. Arnolfo “Arnie” Teves Jr. matapos nga nagboto ang mga mamalidha agud pahalinon na ini sa Kamara.
Isa ini ka maragtason nga desisyon sang Kamara bangud ini ang labing-una nga bes nga nagsipa ini sang myembro halin sang nabalik ang bicameral Congress sang 1987.
265 ka mga kongresista ang nagboto nga i-adoptar ang unanimous recommendation sang Committee on Ethics, wala sang nag-No, samtang tatlo ang nag-abstain nga amo sanday Gabriela party-list Rep. Arlene Brosas; Alliance of Concerned Teachers party-list Rep. France Castro; kag Kabataan party-list Rep. Raoul Manuel.
Ang ginbasehan sang rekomendasyon amo ang pag-absent ni Teves sa trabaho kag pagpangayo sang political asylum sa Timor-Leste nga suno sa komitiba isa ka sahi sang “abandonment of public office”.
Ginrason man ang pag-designar sang Anti-Terrorism Council kay Teves bilang terorista sa pungsod kag ang indi sini disente nga pamatasan sa social media lakip na ang video sini nga nagasaot-saot nga nagasuksok lamang sang boxers nga suno sa panel nagdala sang “dishonor” sa Kamara.
Suno naman kay Atty. Ferdinand Topacio nga abogado ni Teves, ang proceedings sa House Committee on Ethics and Privileges ang makabig nga iya lamang sang “kangaroo court”.
Ini bangud suno sa iya, halin sang pagsugod pa lamang sang proseso, ang Committee amo na ang motu proprio complainant — buot silingon, ini ang nag-akusar apang ini man ang nagpungko nga huwes.
Wala man gintugutan suno sa iya si Teves nga magpartisipar sa proceedings kag ang gintugutan lamang amo ang sulat sang counsel. Nangin sikreto ang hearings suno sa abogado kag sa final recommendation, ginpakita lamang nga wala sang bona fide intention ang Kamara nga i-konsiderar ang ebidensya pabor kay Teves.
Kasunod sang hitabo suno kay Topacio, mahimo na nga dal-on ang kaso sa guwa sang Kamara kag sa DOJ kun sa diin ginalauman nga may yara man sang patas nga pag-tratar kag Teves kag sundon man ang due process.
TERROR TAG
Ginpanindugan man sang chairman sang House committee on ethics and privileges nga na-mensyonar lamang sa iya nga report ang designation sang Anti-Terrorism Council kay Teves bilang terorista, apang indi amo ini ang basehan kun ngaa gin-rekomendar ang pagpahalin siya sa pwesto.
Ini matapos gin-kwestyon ni Iloilo 1st District Rep. Janette Garin kun ngaa gindala ini sa report apisar nga ang pag-designar kay Teves bilang terorista ang magaagi pa sa process of appeal kag final decision.
Ginsulit man ni Rep. Castro ang amo nga inquiry ni Garin.
Sabat ni Rep. Felimon Espares, nalakip lamang ini sa gin-diskusyunan sang committee, apang indi ini ang factor sa recommendation nga sipaon si Teves halin sa Kamara.
Matandaan nga Agusto 1 sang ginpaguwa ang desisyon nga gina-designar si Teves bilang terorista kaupod ang iya utod nga si former Negros Oriental governor Pryde Henry Teves kag 11 ka iban pa bangud sang gin-alegar nga ila nga involvement sa pinatyanay sa Negros Oriental. #
