Suportado ni Presidente Ferdinand Marcos Jr. ang pag-review sang Rice Tariffication Law agud nga mabalik ang gahum sang National Food Authority (NFA) sa tunga sang kontrobersyal nga isyu sa suplay sang bugas kag ang pagsaka sa presyo sini sa mga merkado sa pungsod.
Suno kay Agriculture Assistant Secretary kag deputy spokesman Rex Estoperez, na-mensyonar ni Marcos ang iya pagsuporta sa pag-review sa amo nga layi sang nagsapol ang mga stakeholders sa Malacañang nga gin-organisar sang Philippine Council for Agriculture and Fisheries.
Sa idalom sang Rice Tariffication Law, nakakas ang regulatory powers sang NFA halin sa import licensing tubtub sa pag-usisa sa mga warehouse sang bugas.
Suno pa kay Estoperez, iga-rekomendar man ni Agriculture Senior Undersecretary Domingo Panganiban kay Marcos nga hatagan sang prayoridad ang pag-amyendar sa Rice Tarrification Law. Ginsaad sini nga wala nalakip ang bugas sa priority measures apisar pa nga amo ini ang staple food sang mga Pinoy kag makabig nga isa ka political commodity.
Ginapahayag nga ang nabilin nga stocks sa NFA ang yara na lamang sa 46,000 metric tons.
Base sa pagpakig-istorya sa rice importers, luyag man nga ilakip sa amyendaran suno sa opisyal ang penalidad sa exporters nga wala nagasunod sa kontrata.
Una na nga ginpahayag sang Department of Agriculture (DA) nga samtang wala pa sang gahum ang NFA, sila anay ang magalibot sa mga warehouse sang bugas sa pungsod bangud sa alegasyon nga may yara sang pag-manipula sang stocks agud nga mapa-guwa nga naga-saka ang presyo sini sa mga merkado. #
