Apisar pa nga nakit-an sang Pilipinas nga indi na tuman ka agresibo ang China sa pinakaulihi nga resupply mission sa BRP Sierra Madre sa Ayungin Shoal, mas ginakahangaw-an na subong kun ano gid ang ginapakuno-kuno sang amo nga pungsod.
Suno ini kay Commodore Jay Tarriela, spokesperson sang Philippine Coast Guard (PCG) para sa West Philippine Sea, kasunod sang pag-deploy sang China Coast Guard (CCG) sang mas gamay lamang nga barko sang nagdul-ong ang Pilipinas sang suplay sa Ayungin.
Talalupangdon nga indi ini kaangay sang natabo sang nagligad nga Agusto 5 kun sa diin anum ka dalagku nga barko ang ginpaguwa sang China kag ang isa ang gingamit pa agud nga bombahan sang tubig ang gamay nga barko sang PCG.
Suno kay Tarriela, posible nga luyag ipakita sang China sa kalibutan nga indi man ini tuman ka agresibo sa pagpabalag sang resupply operations sang Pilipinas.
Nakabulig suno sa opisyal ang ginhimo sang PCG nga ginsapubliko gid ang agresibo nga ginhimo sang Beijing sang nagligad nga semana.
Apisar indi na pareho kadelikado sang natabo sang Agusto 5 suno pa kay Tarriela, indi dapat pagkalimtan nga nangbalabag gihapon ang China sa amo nga operasyon sang Pilipinas nga natuon man mismo sa sulod sang teritoryo sang pungsod.
Suno naman kay AFP chief of staff General Romeo Brawner Jr., apisar wala na sang water cannons nga gingamit ang China, naga-guwa nga handa nila gihapon nga gamiton ini bangud ginpaandar na sang coast guard ang iya nga water cannon apang wala lang gintutok sa barko sang PCG.
Matandaan nga sa amo nga operasyon sang Agusto 22, duha ka barko sang PCG ang nag-upod sa sakayan nga gin-commission sang AFP agud magdala sang suplay sa Philippine Marines sa BRP Sierra Madre, ang barko sang Pilipinas nga nagaserbe nga outpost sa Ayungin Shoal.
Ini na ang ikaduha nga resupply mission sang pungsod sa Agusto, matapos nga wala nagmadinalag-on ang routine mission sang Agusto 5.#
