Ginakahangaw-an ang matabo nga oil spill bangud sang paglugdang sang isa ka fishing vessel sa Calatagan, Batangas.
Suno sa Philippine Coast Guard (PCG), ang sakayan nga F/V Anita DJ II ang may karga nga 70,000 ka litro sang marine diesel oil sang naglugdang ini.
Naluwas naman ang 13 sini ka mga crew.
Ginkumpirma man ni PCG-Batangas Station Commander Capt. Victorino Acosta nga may yara na sang oil sheen sa area kun sa diin naglugdang ang sakayan.
Suno pa sa PCG-Batangas official, ang incident command post sang grupo ang na-activate na subong kag nahanda naman ang oil spill response.
Base sa wind trajectory, ang mga banwa sang Calatagan, Lemery, San Luis, Mabini, kag Isla Verde ang posible nga maapektuhan.
Nagakahangawa man subong ang advocacy groups nga madalahig ang Verde Island Passage (VIP) nga kilala nga sentro sang global shorefish biodiversity bangud sang mataas nga densities sang marine resources.
Ang VIP amo ang 1.14-million-hectare nga marine ecosystem nga nahamtang sa coastlines sang Batangas, Romblon, Marinduque, Occidental Mindoro, kag Oriental Mindoro. #
