Ginprotestahan sang Pilipinas, Malaysia, Taiwan, India kag Vietnam ang bag-o nga mapa nga ginpaguwa sang China kun sa diin makit-an ang mas ginpasangkad nga 10 dash lines nga naga-angkon pati sa teritoryo sa West Philippine Sea.
Gin-release sang Beijing ang nasambit nga 2023 version sang Standard Map sang China nga para sa Pilipinas, ‘wala sang basehan sa idalom sang international law’.
Suno sa Department of Foreign Affairs (DFA), iligal ang ginhimo sang China kag nagalapas sa 1982 United Nations Convention on the Law of the Sea (UNCLOS).
Ang siyam ka mga dash sa bag-o nga Chinese map ang nahamtang sa teritoryo nga ginatawag sang Beijing nga South China Sea samtang ang ika-napulo nga dash ang nabutang malapit sa Taiwan nga ginakabig sang China nga Chinese province.
Maathag sa amo nga mapa nga nagalapaw na ini sa exclusive economic zones (EEZ) sang Pilipinas, Malaysia, Brunei, Vietnam, kag Indonesia.
Gin-angkon man sang China pati ang Indian state sang Arunachal Pradesh kag ang Aksai Chin plateau nga amo ang rason sang pag-protesta sang Foreign Ministry sang India.
Kaangot diri, ginkumpirma ni DFA-Office of ASEAN Affairs Assistant Secretary Daniel Espiritu nga nag-file na sang diplomatic protest ang Pilipinas apang wala man gin-athag sang opisyal kun san-o ini gin-file kag kun sa diin nga ahensya.
Para naman kay Senator Risa Hontiveros, dapat nga magpakig-angot na ang DFA sa National Resource and Mapping Authority agud ma-update man ang mapa sang Pilipinas kun sa diin maplastar ang EEZ sang pungsod, ang continental shelves, kag ang territorial seas sa West Philippine Sea.
Nagapati naman si Senate President Juan Miguel Zubiri nga mas magadamo pa ang protesta sa amo nga 10-dash line sang China kag wala naga-isahanon ang Pilipinas sa pagkontra sa China sa amo nga away sa teritoryo. #
