Nagdepensa ang Office of the Vice President (OVP) sa pag-deploy sang 433 ka security personnel para kay Vice President Sara Duterte sang nagligad nga tuig.
Sa statement sang OVP, ginpahayag nga ang deployment sang personnel sang Vice Presidential Security and Protection Group (VPSPG) nga ginsuguran ni Duterte sang Hunyo 2022 ang nagadepende sa assessment sang Armed Forces of the Philippines (AFP) kag sang Philippine National Police (PNP).
Ginpahayag pa sa statement nga “absurd” kag “kulang sa basehan” kun ikumparar ang security personnel ni Duterte sa security personnel sang nagliligad nga mga bise-presidente.
Ini nga statement ang ginpaguwa matapos nag-report ang Commission on Audit (COA) nga ang OVP ang may yara sang 433 security escorts sang 2022 nga 63% sang OVP personnel kag 455% nga mas mataas ipaanggid sa 78 detailed military personnel sa idalom ni former Vice President Leni Robredo.
Ginpahayag pa sang OVP nga wala man sang nakita ang COA nga adverse finding sa pagtukod sang VPSPG bangud amo ini ang magahatag sang proteksyon kag seguridad pati sa masunod nga mga bise-presidente sang Pilipinas.
Gin-depensahan man sang OVP ang dugang nga security personnel para kay Duterte paagi sa pagpatpat sang iya iban pa nga katungdanan lakip na ang pag-pungko bilang Secretary sang Department of Education (DepEd), Co-Vice Chairperson sang National Task Force to End Local Communist Armed Conflict (NTF-ELCAC), kag President sang Southeast Asia Ministers of Education Organization.#
