Ipatuman na epektibo subong nga adlaw, Septyembre 5, ang price ceiling sa bugas nga ginmandu ni President kag Agriculture Secretary Ferdinand Marcos, Jr.
Sa Executive Order No. 39 nga ginpaguwa sang presidente, ginmandu ang P41 per kilogram nga price cap para sa regular-milled rice kag P45 per kilogram para naman sa well-milled rice.
Sa iya speech antes nagpadulong sa Indonesia para magtambong sa Association of Southeast Asian Nations (ASEAN) summit, ginpahayag ni President Marcos nga ang hoarders kag smugglers gid lamang ang rason kun ngaa nagapanglakaak ang presyo sang bugas sa mga merkado sa pungsod.
Ginpaathag sini nga wala siya kuntani sang plano nga pahilabtan ang merkado, apang nagapanghilabot na ang hoarders rason nga kinahanglan na nga magpatunga ang gobyerno.
Suno kay Marcos, apisar nga yara siya sa Jakarta, padayon niya nga tutukan ang sitwasyon sa sektor sang bugas sa pungsod.
Ginpaathag man sini nga temporaryo lamang ini nga tikang bangud nga manugsulod naman sa pungsod ang imported nga bugas kag malapit naman ang tag-alani sang humay.
Suno kay Speaker Martin Romualdez, nagpakig-angot na ang Kamara partikular si House Appropriations Committee Chairperson Zaldy Co sa Department of Budget and Management agud nga may kuhaan sang P2 billion nga pondo agud ihatag nga ayuda sa mga apektado nga rice retailers.
Ginpasalig man ni Romualdez nga magasapol siya sa mga lider sang rice retailers subong nga semana agud nga mabatian ang ila dugang nga concern sa ila nga income.
Suno naman kay Marcos, magahimo ang DA kag ang Department of Trade and Industry (DTI) sang listahan sang retailers kag ang kita nga ila mapierde bangud sa price cap.
Suno naman sa Department of Social Welfare and Development (DSWD), gamiton sang ahensya ang sustainable livelihood program—nga amo man ang programa nga gingamit sang gobyerno nga buligan ang magagmay nga mga negosyo sa tion sang lockdown bangud sa pandemya.#
