Maga-umpisa na subong nga adlaw, Septyembre 14, ang una nga hearing sang special panel on maritime and admiralty zones sang Senado nga nagatuyo nga makahimo man sang kaugalingon nga mapa sang Pilipinas bilang kontra sa 10-dash line sang China.
Suno kay Senator Francis Tolentino nga amo ang magapungko nga chairman sang panel, indi ini matapos sa isa lang ka hearing bangud sa una nga adlaw, istoryahan anay ang pag-establisar sang maritime zones.
Pahayag sang senador, may ginpang-imbita man nga mga resource persons halin sa Beijing University agud nga sila mismo ang makapahayag kun ngaa naghimo sila sang ten-dash line kag kun ano gid ang ila gina-angkon nga mga teritoryo.
Wala pa sang nagkumpirma suno kay Tolentino apang ginalauman nga may present man kun magsugod na ang hearing.
Ini nga hearing sang special panel ang kasunod sang nagasaka nga tensyon sa tunga sang Pilipinas kag China lakip na ang paggamit sang China Coast Guard (CCG) sang water cannon sa mga barko sang Pilipinas nga pakadto sa Ayungin Shoal kag ang napaslawan nga tuyo sang amo man nga pungsod nga balabagan ang isa pa ka resupply mission sa BRP Sierra Madre.
Ang isa pa amo ang bag-o lang ginpaguwa nga 10-dash line nga mapa nga nagapasangkad pa sang ila gina-agaw nga teritoryo lakip na sa West Philippine Sea. #
