Wala sang nangin pagbag-o sa ginaduso nga confidential and intelligence funds (CIF) sang ginpasar na sang House Committee on Appropriations ang proposed 2024 national budget.
Sa ginaduso nga P5.768 trillion budget para sa 2024, yara sa P5.277 billion ang intelligence expenses nga ginahingyo sang gobyerno kag P4.864 billion ang confidential expenses.
Suno kay Committee Senior Vice Chair kag Marikina Rep. Stella Quimbo, duha gid lamang ang gin-amyendahan sang panel sa budget.
Una, sa baylo nga isa ka tuig kag tunga, hatagan sang duha ka tuig ang mga ahensya sang gobyerno nga magasto ang maintenance and other operating expenses.
Ikaduha, kakason ang requirement para sa Kongreso nga magpasa sang reports sa executive branch agud mapasigurado ang kahilwayan sang mga mamalidha.
Wala gin-aprubahan sang panel ang request ni Ombudsman Samuel Martires nga kakason ang requirement nga isapubliko ang reports sang Commission on Audit.
Kasunod sang pagpasar sang panel sa budget, magasugod na ang deliberasyon sa plenaryo sa masunod nga semana para sa final approval sang budget antes matapos ang bulan.
Suno kay Quimbo, umpisahan ang plenary debates sa Septyembre 19 kag posible nga maaprubahan ang hagna sa third reading sa Septyembre 27.
Matandaan nga una na nga ginpahayag sang Kamara nga tuyo sini nga maaprubahan ang budget sa final reading antes ang ila nga break halin sa Septyembre 30 tubtub sa Nobyembre 5. #
