Ginkakas sang Philippine Coast Guard (PCG) ang 300-metros nga delikado nga floating barrier nga ginbutang sang China sa southeast entrance sang Bajo De Masinloc (BDM) ukon mas kilala nga Panatag ukon Scarborough Shoal.
Suno kay PCG Commodore Jay Tarriela, spokesperson sang PCG-West Philippine Sea, ang nasambit nga operasyon ang kasunod sa mandu ni President Ferdinand Marcos Jr. kag National Security Adviser Eduardo Año nga amo man ang nagapanguna sa National Task Force for the West Philippine Sea.
Pahayag pa sang PCG, ang barrier nga ginbutang sang Beijing ang isa ka maathag nga paglapas sa international law kag nagabalabag man sa mga aktibidad sang mga manugpangisda nga Pinoy bangud ginabalabagan ang ila pangabuhian.
Una na nga ginpahayag sang otoridad nga masami ginabutang sang China Coast Guard ang amo nga barrier kun makit-an nila nga nagadamo na ang Filipino fishermen nga nagapanghulik sang isda sa lugar.
Ang nasambit nga area ang kabahin pa sang banwa sang Masinloc sa Zambales — nahamtang 124 nautical miles nakatundan sang amo nga probinsya kag sulod pa sa exclusive economic zone sang Pilipinas.
Ini nga floating barrier incident ang natabo isa ka semana lamang matapos gin-akusaran sang Pilipinas ang China nga nagapang-guba kag nagapangawat sang corals sa Rozul Reef kag Escoda Shoal – ang maritime features nga sulod man sa teritoryo sang West Philippine Sea. Didto nga lugar masami nga nagatumpok ang militia vessels sang China. #
