Naghingyo si Opposition Senator Risa Hontiveros sa Senado nga imbestigaran ang nabuyagyag nga confidential funds ni Vice President Sara Duterte sang siya pa ang alkalde sang Davao City.
Sa reports sang Commission on Audit (COA), nagpain ang Davao City sang P460 million confidential and intelligence funds kada tuig halin sang 2019 tubtub sang 2022 –mas daku nga pondo ipaanggid sa iban nga dalagku kag manggaranon nga mga syudad kaangay sang Makati, Manila kag Cebu nga wala naglab-ot sa P100 million.
Photo Courtesy: Sara Duterte/Facebook
Ginpamangkot man sang senadora kun ano kadaku ang isyu sa seguridad sa Davao City kag kun mas daku pa ini sa agaway sang teritoryo sa West Philippine Sea bangud kun lantawon, mas daku pa ang confidential and intelligence funds sang Davao City ipaanggid sa iban nga national agencies kaangay sang Philippine Coast Guard (PCG).
“While Davao City faces existing security challenges, are these challenges really so much worse than China’s incursions and abuses in our territorial waters? Inaagaw na rin ba ng Tsina ang teritoryo nila tulad sa West Philippine Sea?” pahayag ni Hontiveros.
Plano ni Hontiveros nga istoryahan ang iban pa nga isyu kaangot sini nga pondo kun diskusyunan na sa Senado ang proposed 2024 national budget sa plenaryo.
Nahibaluan nga sa report sang COA, may yara sang P2.697 billion nga confidential funds halin sang 2016 tubtub sang 2022 sa Davao City sa idalom ni Duterte.
Una na nga ginpahayag ni House Deputy Minority Leader kag ACT Teachers Party-list Rep. France Castro nga naggasto ang syudad sang P1.235 million kada adlaw sang nagligad nga anum ka tuig halin sa amo nga pondo.
Ini nga kontrobersiya ang kasunod sang isyu man kay Duterte bangud sang P125 million nga confidential funds nga nabaton sang Office of the Vice President sang 2022 apisar nga wala ini nalakip sa General Appropriations Act — ang budget item nga ginlaragway sang Makabayan bloc nga “irregular and unauthorized.”
Una na nga nagpahayag ang Kamara kag Senado nga iga-realign ang confidential and intelligence funds sa mga ahensya nga amo ang in-charge sa pagdampig sa West Philippine Sea.#
