Ginbawi na sang anay opisyal sang Land Transportation Franchising and Regulatory Board (LTFRB) nga si Jeff Tumbado ang iya ginpangbuyagyag nga kurapsyon sa sulod sang ahensya.
Sa iya nga affidavit of recantation nga ginpirmahan kahapon nga adlaw, ginpahayag ni Tumbado nga ang iya ginpanghambal sang Oktubre 9 ang bunga lamang sang “impulse, irrational thinking, misjudgement, kag poor decision making” kag naapektuhan ang iya nga paminsaron bangud man sang pagpanghaylo sang iban nga mga tawo nga ipaguwa niya ang amo nga statement.
Kun matandaan, gin-alegar ni Tumbado nga si LTFRB Chairman Teofilo Guadiz III ang yara sa sentro sang “lagayan scheme,” kun sa diin nagabaton siya sang bride nga nagadangat pa sa P5 million bilang kabaylo sang madasig nga pag-approve sa special permits, franchises, kag pagbag-o sang mga ruta.
Si Tumbado ang nangin head anay sang communications kag nangin executive assistant ni Guadiz.
Sa iya nauna nga statement, ginpahayag pa sini nga maga-pasaka siya sang kaso batok sa iya gin-alegar nga mga kurap nga mga opisyal.
Gin-suspend man ni President Ferdinand Marcos Jr. si Guadiz kasunod sang amo nga kontrobersiya
Apang sa panibag-o nga statement sang anay opisyal, nagpangayo na ini sang pasaylo kay Guadiz, Secretary Jaime Bautista sang Department of Transportation, kag sa Office of the President.
Pahayag sini, wala siya sang intensyon nga higkuan ang integridad kag reputasyon sang sin-o man nga tawo.
Antes sini, kahapon, nagpaguwa man sang statement si Bautista kun sa diin iya ginpanginwala man ang kurapsyon halin sang nagpungko bilang pinuno sang transportation department.
Apisar nga ginbawi ni Tumbado ang iya nga mga akusasyon, ginsiling sini nga may mga problema sa ahensya nga dapat nga imbestigaran sang otoridad kag pasabton kun sin-o ang responsable. #
