Nadiskubrehan sang mga senador nga ginapanag-iyahan sang Chinese-Korean firm ang barko nga nakabunggo sa sakayan sang mga Pinoy sa West Philippine Sea sang Oktubre 2 kun sa diin tatlo ka mga Pinoy nga manugpangisda ang patay, isa ang nasamaran, kag 11 ang nakaluwas.
Nabuyagyag ini sang nagpatigayon sang imbestigasyon ang Senate special committee on Philippine maritime and admiralty zones.
Photo: PCG
Suno kay Senator Francis Tolentino nga chairman sang amo nga committee, Sinokor ang tag-iya apang indi na siya anay maghatag sang konklusyon kaangot sa amo nga hitabo nga una na nga ginpahayag sang Philippine Coast Guard nga “aksidente” lamang.
Ginkumpirma man ni Coast Guard spokesperson Rear Adm. Armando Balilo nga ang Sinokor isa ka joint venture sang Chinese-Korean groups suno sa ila nga website.
Sa hearing, naghingyo man ang mga senador kun pwede mahatagan sang bulig ang pamilya sang mga biktima apisar wala pa natapos ang dalagan sang imbestigasyon.
Nagtambong sa hearing sa Senado si Capt. Abhishek Sinha nga training director sang manning agency para sa nakabunggo nga commercial vessel nga Pacific Anna. #
