Ginbawi sang duha ka iban pa nga testigo ang ila ginpangbuy-an nga mga testimoniya batok kay anay Senator Leila de Lima.
© 2017 AP Photo/Bullit Marquez
Suno sa anay police officers nga sanday Major Rodolfo Magleo kag Sgt. Nonilo Arile, bawion nila ang ila statements bangud gina-konsensya sila kag luyag nila mabuligan si De Lima nga mahilway na sa presuhan.
“We are bothered by our conscience. We do not want you to be a victim of mistrial. We will reveal in due time. We are assuring you all that the last case will be dismissed,” kabahin sang sulat nga ginpadala kay de Lima kag sa isa pa ka akusado nga si anay Bureau of Corrections (BuCor) Director Franklin Bucayo nga pareho nga yara subong sa Custodial Center sang Philippine National Police (PNP).
Suno sa duha ka pulis, 2018 pa lang, naga-plano na sila nga bawion ang ila mga statement, apang wala nila ini nahimo bangud imposible ang komunikasyon.
Sa amo nga sulat, nagpromisa ang duha ka pulis nga sa husto nga tion, ibuyagyag nila ang importante nga mga impormasyon nga naangot sa katapusan nga drug case nga nagatum-ok sa anay senador.
Isa anay ka police chief inspector si Magleo nga na-convict bangud sa kidnapping.
Una sini nga ginpahayag nga nagbayad si De Lima sang minilyon ka pesos agud nga mahatagan sang special treatment ang convict nga si Jaybee Sebastian nga amo ang ginpahayag naga-kontrol sang drug transactions sa Bilibid.
Si Arile naman ang naga-serbe nga government asset kag nag-testify nga nagahatag siya sang impormasyon sa pulis sa illegal drug transactions sa sulod sang presuhan nga amo ang rason kun ngaa nadihon ang ‘Oplan Cronus’ sang PNP-Criminal Investigation and Detection Group (CIDG).
Isa kuntani ka operasyon ang Oplan Cronus agud magpatigayon sang daku nga raid sa sulod sang Bilibid, apang ginpahayag nga wala nadayon bangud gin-alegar ginpunggan ni de Lima.
Pareho na nga ginsaylo ang duha ka nasambitan nga testigo sa Sablayan Prison and Penal Farm sa Occidental Mindoro bangud sa ginpahayag nga pamahog sa ila safety sa sulod sang New Bilibid Prison (NBP).
Ila man nga ginpahayag nga may lima pa ka state witnesses nga kumbinsido man nga magbawi sang ila nauna nga mga pahayag batok kay de Lima.
Ang kopya sang sulat ang nabaton man sang Clerk sang Court of Muntinlupa Regional Trial Court Branch 206 nga amo ang naga-uyat sang katapusan nga drug case sang anay senador.
Matandaan nga antes sini, ang mga testigo nga nagbawi man sang ila una nga statements amo sanday former BuCor Officer-in-Charge (OIC) Rafael Ragos kag confessed drug dealer nga si Kerwin Espinosa.
Nahibaluan nga masobra anum ka tuig na nga naka-detain si De Lima matapos nagpasaka sang kaso ang Duterte administration batok sa iya bangud sa gin-alegar nga involvement sa illegal drug trade sang nagapungko pa siya bilang justice secretary. #
