Patay sa ambush ang isa ka kandidato sa pagka-punong barangay sa banwa sang Kapatagan sa Lanao del Sur.
Ang biktima amo si Kamar Bilao Bansil, 50, nga napatay on the spot bangud sa tuman ka damo nga pilas nga naangkon tuga sang bala sang pusil.
Photo Courtesy: Lanao del Sur PPO
Suno pa kay Police Colonel Robert S. Daculan, police provincial director sang Lanao del Sur, yara man sa seryoso nga kondisyon ang asawa kag menor de edad nga anak ni Bansil.
Suno pa sa pulis, ginbanggaan sang indi pa matumod nga numero sang armado nga mga lalaki ang salakyan sang biktima sang yara ini sa Barangay Sigayan — ang barangay kun sa diin nagapadalagan siya sa pagka-kapitan bilang isa ka independent candidate.
Lakip sa ginpangalanan nga gunman — sandig man sa testomoniya sang mga testigo sa pulis — amo si Pabril Pagrangan nga bana sang incumbent punong barangay sa amo nga lugar nga magapa-reelect man sa Oktubre 30.
Sang nag-responder ang otoridad sa ambush site, nakit-an ang 30 ka empty shells sang M16 rifles.
Pahayag pa sang pulis, padayon pa subong nga gina-ayam ang mga suspek matapos nga nagpalalagyo sa lain-lain nga direksyon kasunod sang krimen.
Ini nga ambush amo na ang ika-13 nga violent election-related incident sa Bangsamoro Autonomous Region in Muslim Mindanao. #
